رواية لا أرتوي إلا بعشقك
رواية لا أرتوي إلا بعشقك بقلم نداء علي
الفصل الأول
شخصيات القصة
الابطال الأساسيين
عابد عمران..
عم بطلتنا عهود.. ووالد معاذ
عابد شخصية قوية ذكية.. حازم مبيهزرش كتير.. تاجر كبير من اكبر تجار الدهب...عنده ٣اولاد
عبد الرحمن..
الأخ الاصغر لعابد.. عمره ٣٥ سنه اتجوز زميلته في الجامعه رغم رفض اهله لكنه كان بيحبها واتمسك بيها...شخص هادى.. ذكي.. رومانسي.. انطوائي يختلف في كل طباعه عن عابد ومع ذلك بيحب عابد وبيحترمه لانه رباه وساعده يكمل تعليمه وعمره مع اختلف معاه غير وقت زواجه من أمل
الكبير معاذ..
نسخة من عابد في الشخصية.. عنيد بيساعد والده في التجارة.. بيخطط انه يبقي ظابط.. بيتدرب علي رياضات مختلفة علشان يحقق حلمه ويبقي ظابط شاطر
حسن..
الولد الثاني.. هادي وواخد طبع والدته اكتر من والده..
وعلاقته بمعاذ قوية وبياخد رأيه في اي حاجة تخصه اسامة
اصغر واحد في اولاد عابد.. دمه خفيف ومرح جداا عكس معاذ في كل حاجة ودايما علي خلاف مع بعض ريم
اخر العنقود.. بنوته جميلة.. متدلعه من الكل حتي ابوها بيحبها وقريبة منه.. الوحيدة اللي بتقدر تهزر وتضحك معاه براحتها
شادية زوجة عابد..
أم مصرية جميلة.. مكتفية ببيتها واولادها.. وملهاش رأي بأي حاجة لانه عابد شايف ان دورها تهتم بشؤون البيت وبس عهود
بنوته في بدايه مرحلة المراهقة عمرها ١٣ سنه بتشبه البنت المصرية بعيونها السودة ورموشها الكثيفة.. شعرها اسود وبشرتها قمحية بس عندها كاريزما مش معقولة..
زي نجوم السينما.. واثقة في نفسها.. مرحة
ومحبوبة....بس مرتبطة بابوها بصورة قوية جدااااااا
الفصل الاول
بالاسكندرية.. تجلس عهود بجانب والدها تتناول الفطور كما اعتادت كل يوم
عبدالرحمن عمران
طبيب صيدلي، مقيم بالاسكندرية يقاطعه افراد عائلته منذ سنوات بسبب زواجه من أمل،حبيبته وزميلته بالجامعه
احبها لسنوات وعندما اراد التقدم لطلب يدها عارضه اهله بشدة وخاصة شقيقه الكبير، عابد.
لا يستطيع احد أن يتواصل مع عبدالرحمن سوى والدته،
الحاجة زينب فهي الوحيدة التي لا يقدر عابد علي معارضتها .
أمل فتاة جميلة لكنها من عائلة متواضعه مادياً ، لا تليق بعائلة عبدالرحمن كما ان عائلته لا تؤمن بالزواج عن حب، بل هناك اصول وتقاليد يجب الالتزام بها.
عبدالرحمن بسعادة : ياااااه يا أمل مش قادر اتخيل ان عابد خلاص قلبه حن ووافق انه يكلمني من تاني.
أمل : انا اسفه يا عبده كل اللي حصل ده بسبب اصرارك علي جوازنا
عبدالرحمن بصدق : ولو الزمن يرجع بيا تاني هختارك إنتِ يا أمل، انتِ حب عمري وكفاية ربنا كرمنا بعهود ، دي هي الدنيا ومافيها.
عهود بسعادة : ربنا يخليك ليا يا بابا انا بحبك اوووووي، بحبك اكتر من نفسي.
عبدالرحمن : طيب ممكن طلب وتحققيه لبابا حبيبك.
عهود : طبعا يا بابا.
عبدالرحمن : عاوزك دايما قوية يا عهود، بس قوتك تكون في الحق، متسمحيش لحد يظلمك ولا تسمحي لنفسك تظلمي حد
والأهم متخافيش من حد غير من ربك، فهماني يا دودو؟! قالها بحنو بعد أن طبع قبلة فوق جبينها.
عهود : حاضر يا بابا.
عبدالرحمن : كمان طلب خاص بيا ممكن؟!
عهود بمشاكسة : اتفضل مش هنخلص بقي.
أمل : عيب كده يا دودو
عبدالرحمن : سيبيها تدلع.. بصي ياست عهود.. النهاردة هنسافر الشرقية.. هنروح بيت جدك الله يرحمه وبيت عمك عابد.. هو كبير العيلة وكلمته بتمشي عالكل.. بما فيهم انا عهود : بس انا معرفوش وعمري ما شفته
عبدالرحمن : وعلشان كده اتمني لما يشوفك يعرف اني مخلف بنوته زي القمر ذكية، ومؤدبة، فهماني، بلاش شقاوة ولا مشاكل مع حد من ولاد عمك.
عهود بتأفف : حاضر، بس بلاش نطول في القاعدة عندهم.
عبدالرحمن : حاضر يا حبيبة بابا.
بالشرقية ببيت عابد الشرقاوي، واحد من كبار تجار الذهب بالمحافظة ومعروف بسمعته الحسنه وقوته، فهو قليل الكلام تاجر محنك، لا يتراجع عن وعد قطعه مهما كانت الاسباب، بحياته الكثير من الغموض والتناقضات.
لدي عابد ثلاثة ابناء ذكور اكبرهم معاذ، يليه حسن ثم اسامة، ولديه فتاة واحدة هي الصغري بين ابنائه والأقرب لوالدها، تدعى ريم .
زوجته شادية امرأة مصرية اصيلة تحاول الحفاظ علي بيتها واسرتها، لا يعطي لها عابد الفرصة لابداء رأيها فيما يخص حياة ابنائها فهو الأدري والأقدر علي اتخاذ القرارات وهي دورها ان تهتم بمأكلهم وما يخص الشؤون المنزلية.
عبير.. هي الأخت الوسطى بين عابد وعبدالرحمن
.. أرملة ولديها ابنتان وبعد وفاة زوجها لم يسمح لها عابد بالعيش بعيدا فاصبحت تعيش معهم، في كنفه وتحت رعايته.
بينما يستعد عبدالرحمن للذهاب لبيت والده بلهفة وحنين دام لسنوات، يستعد الجميع لاستقباله
تقف الحجة زينب بالمطبخ تشرف علي ما تعده شادية وعبير.
الحاجة زينب : همي شويه يا شادية إنتِ وعبير عبدالرحمن علي وصول .
عبير بسعادة : مش قادرة اصدق اني هشوفه، ياااه ده وحشني اووووي.
شادية : الحمد لله ربنا يجمعنا دايما علي خير ويهديكم لبعض.
زينب : انشالله يابنتي، يلا شهلي شوية، ومتنسيش تعملي المعمر اللي بيحبه عبدالرحمن يا أم معاذ.
شادية بمحبة : من عنيا يامه، ربنا عالم غلاوة الدكتور عبدالرحمن، وياما نفسي اشوف بنته ومراته.
بينما يجلس معاذ وحسن واسامة وريم ومعهم بنات عمتهم عبير، مرام وهدي.
معاذ بتأفف : هنفضل قاعدين كده كتير انا عندي تدريب في النادي.
حسن : معلش النهاردة يامعاذ ده عمك اول مرة يجي البلد من سنين، انا عن نفسي معرفوش وانت اكيد مش فاكرة اوي.
معاذ : يعني مش فاكرة كويس، اخر مرة شفته كان وقتها عندي يجي ٥ سنين، بس عادي يعني وجودي هيفرق في ايه.
توقف معاذ عن الكلام عند رؤيته لتلك الفتاة الصغيرة التي قد أدرك هويتها من مجموعة الصور التي رأها لعمه واسرته.
انها عهود ابنة عمه، نظر اليها بغيظ ونظرت هي إليه بترقب.
اجتمع اهل البيت بسرعة ولهفة واشتياق لمقابلة عبدالرحمن.
عابد بهدوء واشتياق يحاول اخفائه : نورت بيتك يا عبدالرحمن
عبدالرحمن : ده نورك يا ابو معاذ وحشتني أوي أوي يا حاج عابد.
عبير : وانا مش وحشاك يا عبود
عبدالرحمن بلهفة : حبيبتي يا عبير وحشتيني اوي عمرك ما غيبتي عن بالي.
اقتربت عبير من أمل وعهود ناظرة اليهم بمودة قائلة : اهلا اهلا بست البنات حبيبة عمتها، ازيك يا دكتورة أمل منورة البلد.
أمل : متشكرة اوي ده نورك.
عهود : حضرتك عمتو عبير
عبير : أه ياست عهود انا عمتو، ودول بنات عمتك، مرام، وهدير.
ابتسمت عهود بخجل، لتنظر اليها ريم قائلة : ماشاء الله ياعهود إنتِ جميلة اوي.
انتهي الجميع من استقبال عبدالرحمن وعائلته الصغيرة بترحاب وحفاوة شديدة، لينتبه عبدالرحمن الي معاذ الذي ظل واقفاً بعيدا ينظر اليهم بترقب.
عبدالرحمن : مش ده معاذ بردة يا عابد!
عابد : ايوة هو، قرب يا معاذ سلم علي عمك ولا مستني حد يقولك، قالها عابد بحدة طفيفه وتحذير
معاذ : حمد الله عالسلامة ياعمي
عبدالرحمن : الله يسلمك ياحبيبي، انت في سنة كام دلوقتي؟!
معاذ : اولي ثانوي ياعمي.
عبدالرحمن : بسم الله ماشاء الله، ده انت بقيت راجل اهو، ربنا يبارك فيك يا حبيبي
تناول الجميع الطعام.. كانت اجواء مبهجة مليئة بالاحاديث المتنوعة عن حياة عبدالرحمن بالاسكندرية وحياة اهله بالشرقية واقتراح عابد ان يعود عبدالرحمن للعيش وسط اهله.. ولكن عبدالرحمن طلب منه بعض الوقت لترتيب اموره.
عابد : عالعموم يا عبدالرحمن اللي يريحك وفيه مصلحتك اعمله، وحقك من يوم ما سافرت لحد النهاردة محفوظ في البنك.
ثم مد يده بورقة واعطاها لعبدالرحمن .
عبدالرحمن : ايه ده ياعابد ؟!
عابد : حقك، ٢٠٠ الف جنيه نصيبك من محل الدهب .
عبدالرحمن : بس انا متعبتش ولا اشتغلت معاك.
عابد : بس ليك نصيب من ابوك الله يرحمه، ولا انت فاكرني
علشان زعلنا مع بعض هاكل حقك.
اقترب عبدالرحمن من عابد لينحني مقبلاََ َ رأسه بامتنان :
ماعاش ولا كان اللي يخونك ياحاج عابد، مع انك قسيت عليا اوووي، بس انت مستحيل تخون ولا تاكل حق حد.
عابد : خلاص يا عبدالرحمن، اللي فات مات، ان شاء الله منفترقش تاني، ثم أكمل بمزاح خفيف :
وياسيدي هجوز عهود لمعاذ ونبقي نسايب.
عبدالرحمن : يا عالم هعيش لما اجوزها ولا لأ، المهم تخلي بالك منها يا عابد، عهود ملهاش حد غيري.
عابد : بلاش السيرة دي ياعبدالرحمن، وانت.... قاطع حوارهم أصوات شجار تأتي من الخارج اسرع عابد وعبدالرحمن ليتفاجئا معا
فمعاذ يمسك يد عهود ويبدو عليه الغضب وهي تصرخ بحدة تود ان تتخلص من قبضته
عهود : سيب ايدي يا حيوان، والله العظيم لو ما سبتني لأكون نفخاك.
معاذ : انتي ياشبر ونص هتنفخيني، واضح ان لسانك طويل ومحتاجة تتربي.
عابد : سيب بنت عمك يا معاذ بدل ما اخلص عليك
معاذ بعناد : مش سيبها، دي شتمتني علشان خبطتها وانا معدي وما اخدتش بالي
عهود : ما اخدتش بالك يبقي مفروض تعتذر مش تقل ادبك.
عبدالرحمن : عهوود، عيب كده اعتذري لابن عمك.
عابد: لا معاذ هو الكبير وهو اللي يعتذر معاذ : لا، هي قليلة الادب .
عابد : اعتذر يا ولد بدل ما اضربك بالجزمة .
معاذ : حضرتك معودني معتذرش غير لما اغلط وانا مغلطتش .
عابد بحدة وهو يهم بضرب معاذ : وانا لما اقول كلمة متراجعنيش ولا ترد كلامي .
حال دون يده التي أوشكت علي صفع معاذ يد عبدالرحمن الذي تحدث بجدية :
والله العظيم يا عابد لو مديت ايدك عليه بسبب عهود لكون واخدهم ومروح، ميصحش تضربه هو فعلا مغلطتش.
عابد : غلط مغلطتش انا كلمتي تتنفذ.
معاذ بغيظ : حاضر، انا اسف.
ثم همس بالقرب منها :
اللي حصل دلوقتي هدفعك تمنه يا عهود بس اصبري.
عهود : طظ، متقدرش تعمل أي حاجة، قالتها بثقة ونظرها لا يحول عن والدها وكأنها تعلم أن حياتها يساندها درع لا يمكن لأحد اختراقه.
🔸🔸🔸🔸🔸🔸🔸🔸🔸🔸🔸🔸🔸🔸
بينما تحاول الحاجة زينب ان تتصل بأخيها الاكبر، الحاج سليمان والد شادية زوجة عابد.
الحاجة زينب : السلام عليكم يا أبو بدر، ازيك ياخويا وازي صحتك.
سليمان : الحمد لله يا زينب ازيك إنتِ عامله ايه؟؟
زينب بسعادة : بخير وفضل من ربك، نظرت إليه بأعين يغزوها غبطة لا حدود لها قائلة
عبدالرحمن وصل،
عبدالرحمن في بيته يا سليمان.
سليمان : الحمد لله ربنا يهديهم لبعض.
زينب بتردد : مش هتجيله بقي يا سليمان؟!
مش هتحن علي اختك اللي ملهاش غيرك بالدنيا وتخش دارها يا ابو بدر!
سليمان : مش هيحصل يا زينب، طول ما انا عايش البيت اللي بنتي انطردت منه مرة ومتعمليش وقتها خاطر عمري ما هخشه طول عمري، لما عبدالرحمن يرتاح هبعتله بدر يجيبه يقعد عندنا يومين ولا ده مش بيت خاله.
زينب بحزن لكنها تتفهم موقف شقيقها وليت بمقدورها أن تغير ما كان من قبل :
اللي تؤمر بيه ياخويا.. ربنا يطولنا بعمرك ويريح قلبي من الحيرة اللي مش عاوزة تفارقني من سنين
♥️♥️♥️♥️♥️♥️♥️♥️♥️♥️♥️♥️♥️
ان شاء الله هتنزل الرواية يومياً، ياريت نتفاعل ونشوف الآراء