اسكريبت كارا
اسكريبت كارا بقلم لبنى دراز الفصل الأخير
#البارت_الثالث_والأخير
#كارا
🚀❤🚀❤🚀
في زمنٍ تهاوت فيه الكواكبُ تحت وطأة الظلام، ولم يبقَ للنور موطئٌ قدمٍ إلا في قلوبٍ تأبى الانطفاء، وُلد من رحم الأرض رجلٌ حمل في صدره يقينًا أن الحبّ طاقة وأن الإيمان سلاح وأن النور حين يُشعل من الداخل يستطيع أن يُطفئ لهيب الكراهية في مجرّة بأكملها، وها هو الآن، يقف على أعتاب حرب الوجود لا بجيشٍ ولا بعدّة، بل بقلبٍ أحبّ وصدق وآمن... فكان النور ذاته.
كارا بقلمي✍️_______لبنى دراز
فـ كوكب الأرض
بيت نائل
بعد ظهور نائل وكارا ع شاشة التليفزيون واختفائهم مرة تانية قعد همام وليلى ووائل فـ حالة ذهول، بتتنقل نظراتهم بينهم وبين بعض وعقولهم مش مستوعبة اللى شافوه وسمعوه وفجأة وقفت ليلى تصرخ بأنهيار لدرجة ان جيرانها اتجمعوا ع صوتها عشان يطمنوا عليهم وسمعوا اللى عمرهم ما كانوا يتخيلوه، وشافوا.
وائل قرب من ليلى بيحاول يهديها ونبرة صوته حزينة مليانة توسل: يا ماما ارجوكي كفاية صريخ، كدا هيجرالك حاجة.
ليلى بصت له بعيون وارمة من كتر العياط وهى واقفة وحاطة إيديها الاتنين فوق راسها كأنها بتحاول تمنع نافوخها من الانفجار بنبرة صوت عالية: هيجرالى اييييه أكتر من اللى انا فييييه؟! اخووووك اللى كنت بقول عليه عاااااقل اتجنن ع الآخر، خلااااااااص ضاقت عليه الأرض رايح يحب ويتجوز فـ الفضااااا، طب ده هيخلف ازااااااى؟! ويخلف ايييييه؟! احفااااااادي هيبقوا ايييييه؟ بني أدمين زينا ولا كائنات فضائية زى اللى حبها؟!
وائل بص لـ امه ومش عارف يضحك ولا يواسيها، بقى واقف مش عارف يرد عليها وبينقل عينه بينها وبين الجيران اللى واقفين متنحين من الصدمة وساكت.
همام قام وقف وقرب من ليلى بهدوء ونبرته كلها حزن: وبعدين معاكي يعنى يا ليلى، مش تهدي كدا وتوحدي الله، اللى بتعمليه فـ نفسك ده مش هيحل ولا يربط، خلاص اللى حصل حصل
ليلى بعصبية: لا اله إلا الله يا همام، لا إله إلا الله، هو ده اللي ربنا قدرك علييييه؟! بدل ما تتصررررف.
وائل بهدوء: يا ماما يا حبيبتي، هيتصرف ازاى بس؟ هو نائل فـ الأرض اصلا، ده برة الكوكب خالص يا أمي هنعمل ايه يعنى.
واحدة من الجيران خرجت من صمتها وبصت لـ وائل بذهول: يعنى ايه يا وائل يا ابني اخوك اخوك اتجوز برة الكوكب؟ فهمنا يا حبيبى الله يخليك.
وائل بص لـ ليلى بنظرة عتاب ورد ع الجارة: يا طنط حضرتك عارفة ان نائل بيشتغل فـ وكالة فضائية فهو طلع رحلة جديدة واتأخر فيها وماما قلقانة عليه ومن كتر قلقها افتكرت ان فى كائنات فضائية خطفته وواحدة منهم عايزة تتجوزه مش أكتر يعنى.
الجارة بصت لـ وائل باستغراب من غير ما تنطق ولفت وشها لـ ليلى وقربت منها طبطبت ع ايدها بتواسيها بنبرة مندهشة: هوني ع نفسك يا ام وائل ان شاء الله ابنك يرجع بالسلامة، هو معقول يعنى بني أدم يتجوز اللهم احفظنا الكائنات اللى بتقولي عليها دي؟!
وائل بص لـ جارتهم برفعة حاجب وكاتم ضحكه عشان مامته: هو فى ايه يا طنط؟ هم عفاريت؟ دول كائنات مخلوقات من خلق الله، صحيح مش معقول ان بني أدم يتجوز منهم بس فـ النهاية موجودين بيشوفونا ونشوفهم عادي خالص.
الجارة وهى بتتحرك ناحية باب الشقة المفتوح مع باقى الجيران المصدومين وهى الفضول هيقتلها: طيب يا ابني ربنا يطمنكم عليه، وابقى طمني يا حبيبى لما تطمنوا ان شاء الله.
الجيران خرجوا فعلا وقفل وراهم وائل الباب ورجع قعد ع الكرسي وسكت بيفكر فـ اللى حصل ورد فعل جيرانهم، صحيح الجيران فـ المناطق الشعبية دايما مع بعض فـ الحزن قبل الفرح لكن برضو بيتكلموا كتير فـ كل حاجة وأى حاجة، وقاعد قلقان من كلامهم ع أخوه نائل واللى قالته ليلى.
همام بص لـ مراته بعتاب بعد ما مشيوا جيرانهم ونبرته كلها لوم: ينفع اللى عملتيه ده؟ الناس تقول علينا ايه دلوقتي يا ليلى؟ أكيد هيطلعوا يتكلموا علينا ويقولوا مجانين ولا راكبهم بسم الله الرحمن الرحيم، جن.
ليلى قاطعته بعصبية: يقولوا اللى يقولوه مايهمنيش، اللى يهمني ابنى، رجع لي ابنى يا همام.
لسة همام هيتكلم ويرد عليها سمعوا جرس الباب وقام وائل يفتح وشاف عمار قدامه كان رايح يطمنهم ع نائل بعد ما رجع ويسلمهم اللاب بتاعه وحكى لهم اللى حصل بالتفصيل زى ما حكى قصاد كاميرات الصحافة والتليفزيون بالظبط واستأذن منهم بعد كدا ومشي، اما هم رجعوا قعدوا مكانهم ونفس علامات الذهول ع وشوشهم مش قادرين يتخطوا اللى بيحصل ولا مصدقينه.
_______________________
فوق سطح القمر
بعد ما نائل اطمن ع زمايله الرواد انهم وصلوا كوكب الأرض بسلام واطمن ع أهله وطمنهم عليه، قال لـ كارا انه موافق يخوض معاها الحرب ويقف قصاد اى كائن بيهددهم.
كارا قربت منه وهى سعيدة بقراره مسكت إيده وعيونها ع ميروك قائد الجيش وبنبرة كلها حماس وتنهيدة اطمئنان: أخيرا ميروك هنقدر نقف فـ وش زورال وشعبه.. وبصت لـ نائل بحب: ونقدر نحافظ ع ارض نوفارا ونحميها من الدمار بفضل القائد نائل البشري العظيم.
هز ميروك راسه وابتسم ورفع ايده لجيش وشعب نوفارا وارتفعت الهتافات باسم نائل: يحيا القائد البشري العظيم، يحيا القائد البشري العظيم.
نائل بص لهم بذهول واستغراب وقبل ما ينطق لقى نفسه مرفوع ع كتف واحد من الكائنات وهو بيبص له وعيونه الغريبة كلها سعادة وهمس له: يحيا القائد البشري العظيم.
كارا بصت للكائن اللى رفع نائل بهدوء وغيرة شديدة واضحة جدا فـ كلامها: ثيورا!! نزلي القائد من فوق كتافك واقفي مكانك فـ صفوف الجيش، ماتتحركيش من غير أمر القائد ميروك.
ثيورا نزلت نائل وبصت فـ الأرض بخجل وبنبرة كلها سمع وطاعة: أمرك مولاتي كارا.
وبالفعل رجعت ثيورا مكانها تاني وسط الصفوف، اما نائل بص لـ كارا وحس بغيرتها واستغرب جدا لما اتفاجئ ان الكائن اللى شاله كانت انثى، وجواه: معقول حتى هنا كما فى غيرة بالشكل ده؟!
قربت كارا أكتر وحطت ايدها ع مكان قلبه وبنظرة من عيونها الزمردي وكأنها شافت الكلام اللى داير جواه: الأنثى، أنثى فـ كل مكان، حتى هنا.. وهمست: كارا بتحب نائل وبتغير عليه.
ابتسم نائل لـ كارا من غير ما يتكلم وبص لـ ميروك بهدوء: عايز اعرف كل حاجة بخصوص نيربيس قبل ما نبدأ حرب الوجود.
هز ميروك راسه: أمرك أيها القائد البشري العظيم.
وابتدى يحكي، وصوته مليان حزن: زورال قائد شعب نيربيس، كان من حراس النور، وكان بيحب كارا جدا، وطلب من والدي القائد الأعلى لمدينة نوفارا انه يرتبط بيها ويجمع الشعبين تحت راية واحدة، لكن كارا رفضت الارتباط بيه، لإن قلبها كان اتعلق بيك من مليون سنة فاتت.
قاطع نائل كلام ميروك بذهول: مليون سنة؟! ازاى؟!
قربت كارا منه وعيونها بتلمع وطالع منهم شعاع زمردي ملا السما نور بنفس اللون، وشعرها اتلون بالأحمر الناري دليل ع سعادتها بوجوده جنبها: من وقت ما بدأت تبعت إشاراتك الجميلة نائل، كل نغمة وإشارة منك كانت بتاخد قلبي عندك، عشان كدا استنيتك وانا متأكدة انك جاى.
ابتسم نائل لما لاحظ عيون كارا وشعرها وهما بيزيد جمالهم من فرحتها وحبها الواضح ع ملامحها وقرب منها أكتر مسك إيدها ورد باستغراب: بس الكلام ده حصل من 3 شهور تقريبا كارا يبقى ازاى بتقولي مليون سنة؟!
كارا ابتسمت برقة: نائل حبيبي، الوقت هنا بيمشي أسرع كتير من كوكب الأرض.
كمل ميروك كلامه لـ نائل بحزن شديد: لما عرف زورال ان كارا رفضته ابتدى يتحوّل من حارس نور لـ حاكم ظلام، وجمع جيش عظيم من شعب نيربيس ومن شعوب باقي كواكب المجرة، وهدد بتدمير أرضنا واختفاءنا للأبد.
بصّ نائل لـ كارا، وعينيه بتسأل بحيرة: يعني هو مش مخلوق من الضلمة؟
ميروك: لأ، الضلمة دخلت قلبه بعد ما فقد أمله فـ ارتباطه بـ كارا ومن ساعتها، بقى بيكره كل كوكب فيه نور، خصوصا نوفارا.
كارا بصّت للأرض، وقالت بنبرة فيها وجع بعد ما اتغير لون عيونها ولون شعرها: شعب نوفارا، شعب نوراني مسالم نائل، مالوش فـ الحروب، وزورال استغل كل الشعوب السوداوية وعمل كيان مظلم ما يعرفش النور ولا الرحمة، ومن ساعتها بقى اسمه حاكم الظلام الملك المظلم.
سكتت لحظة، اتنهدت بوجع ودموعها نازلة زى الشلال، وبصت فـ عيون نائل: بقى بيعيش ع تخويف الشعوب المسالمة فـ كل الكواكب، وبيمد جيشه بظلام الأحلام المكسورة والقلوب الموجوعة، وهدفه مش تدمير ارض نوفارا وبس، لأ ده عايز يطفى نور الحب فوق سطح القمر وفـ كل الكواكب، عايز ينتقم من الكل بسببي انا نائل.
نائل اتنهد، وبص لـ كارا بقلق: يعني اللي بيحصل دلوقتي ده، سببه حبه ليكي؟! سخّر انتقامه منك لـ حرب هتبلع الكواكب كلها؟
ميروك كمل بصوت جاد: زورال جمع جيش كبير ودمّر سبع عوالم، ودلوقتي بيستعد يهجم علينا بمركبة من صنع ايديه اسمها عصب الغضب، فيها طاقة ظلام تكفي تمسح النظام الكوني كله.
سكت لحظة، وبعدين بص لـ نائل: الحرب دي مش بس ع نوفارا زى ما قالت كارا، دي ع وجود النور نفسه فـ كل مكان، ولازم نجهّز التحالف الكوني عشان نقدر نقف قصاده.
نائل: قصدك نضم الكواكب اللي لسه ماوصلهاش جيش زورال، لجيشنا؟ بس ازاى ده يحصل؟!
كارا: أيوا نائل، أنت الوحيد اللى تقدر تعمل كدا، لان النور اللى فـ قلبك يقدر يهزم اى ضلمة مهما كانت قوتها، باتحاد قلبي وقلبك ونور حبنا هنقدر نهزم زورال وجيشه ونحافظ ع وجود شعب نوفارا وباقي الشعوب من الهلاك المؤكد، وبـ نور قلبك. ويقينك هتقدر تجمع كل الكواكب دي تحت رايتك.
نائل واقف بيبص للفضاء اللي
مرسوم قدامه فـ خريطة ع شاشة شفافة وبدء يفكر شوية، وبنبرة جدية: يبقى نجهّز الجيش ونبعت رسايل للحلفاء، ونعلنها حرب وجود، بس الحرب دي مش هتكون كلها بالسلاح، لازم نبتديها الأول بطاقة النور، اللى فـ قلوبنا عشان نعرف نكسر الضلمة من جوة زورال، ونرجعه حارس لـ النور من تاني.
ميروك بابتسامة ونبرة فخر: دلوقتي فهمت ليه كارا اختارتك.
كارا رفعت عينيها لـ نائل، وابتسمت: اختارته ميروك، لأنه مش بس قائد بشري عظيم، ده كمان نور وامل وحلم عظيم.
خلصت كلامها وبعد لحظات بعت نائل وميروك الرسايل لـ جيش التحالف الكوني، وابتدت الجيوش تتجمع فـ ساحة النور وقبل الهجوم ع جيش زورال وقف نائل قدام جيش التحالف وكانوا آلاف من المحاربين، من كواكب مختلفة، كله واقف فـ صمت، مستني إشارة منه، كارا كانت جنبه، لابسة درع نور، عينيها زي شعلتين منورين بلون الغضب.
نائل رفع سيفه النوراني، وصوته كسر الصمت: إحنا بنحارب زورال وجيشه عشان نقضي ع الضلمة للأبد وتفضل الكواكب مليانة بالنور.
وضرب السيف فـ الأرض، انفجرت حواليه موجة طاقة قوية، فجأة السما انشقت وخرجت منها مركبة زورال العملاقة عصب الغضب، كانت ضخمة جدا كأنها كوكب طاير بتنط منها كائنات الظلام زي سرب غربان سودة نازلة تنقض ع فريستها.
ميروك صرخ: اهجموااااااااااااا!
وانطلقت أول موجة، التحالف كله اتحرك ناحيتهم والساحة اتحوّلت لجحيم، نائل كان بيقاتل بضراوة سيفه بيرسم دوامات نور وسط الضلمة كل ما يضرب كائن ينفجر دخان أسود ويختفي، بس عددهم كان كبير، كل ما يموت واحد بيطلع بداله اتنين، كارا كانت جنب نائل بتطلق موجات طاقة زرقا من إيديها بتقضي بيها ع خطوط الضلمة فـ أى مكان، ظهرت فجأة قدامها بوابة سودة خرج منها زورال، كان أطول من كل الكائنات الفضائية عيونه كلها نار وجسمه أشبه بالظل الأسود، حواليه هالة غريبة بتخلي أى حد يشوفه يتجمد مكانه من كتر الخوف، بص لـ نائل، وبنبرة بصوت قوية رجّت ساحة المعركة: ايها البشري، ايه اللى جابك ارض مش ارضك؟ وتعيش حياة مش حياتك؟
نائل لف سيفه، ومشى ناحيته وبنبرة مليانة قوة: جيت أحمي شعوب الكواكب النوارنية من الكائنات السوداوية، جيت أرجّعك للنور وأكسر الضلمة اللى جواك.
ضحك زورال ضحكة خلت السما تتهز من قوتها: مافيش حاجة اسمها نور بعد دلوقتي، فيه ضلمة وفوضى وبس.
وفـ لمح البصر هجم ع نائل، وكل ضربة منه كانت بتخلّي الأرض تتشقق تحت رجل نائل اللى كان بيصد بكل قوته ويتراجع خطوة ويتقدم خطوتين.
كارا حاولت تدخل وتتحد مع نائل بس الكائنات السودة حاصروها ومنعوها تقرب منهم.
ميروك صرخ: لازم نائل يكمل لوحده كارا، النبوءة لازم تتحقق.. قلب واحد مليان نور هيقاوم الضلمة دي كلها.
نائل وقع ع ركبه وسيفه اتكسر، زورال قرب منه وبدأ يلف حواليه بسرعة رهيبة.
كارا صرخت من بعيد بخوف: نااااااائل، إوعى تستسلم، النور مش فـ السلاح، النور جواك انت النور فـ قلبك.
نائل سمع نداها، غمض عينه ثانية، وسحب من جوّاه طاقة جديدة، طاقة طِلعت من حبه لـ كارا ومن خوفه ع شعوب الكواكب النورانية، من حلمه البسيط إنه يفضل في نور فـ الكون، فجأة قام وقف وإيده نورت وطلع منها سيف جديد من طاقة نقية، وبص لـ زورال وبنبرة قوية: النور مش بيحتاج جيش زورال، بيحتاج قلب مؤمن، ومن اللحظة دي مافيش ضلمة تاني وللأبد وبضربة واحدة من سيفه، ملأت السما كلها نور، صرخ زورال وجسمه اتفتت واختفى، وكل كائنات الظلام انهارت بعده واختفت، انتهت المعركة وكل جيش التحالف واقع منهك، وكلهم مابين قتلى وبين جرحى، بس فـ النهاية قدروا يهزموا زورال وكائنات الظلام.
نائل راجع إيده فيها السيف النوراني، وعينه بتدور ع كارا وأخيرا لمحها.
كارا جريت عليه، حضنته بقلق: انتهت الحرب خلاص؟
نائل بابتسامة مرهقة: انتهت خلاص حبيبتي، ودي البداية
كارا: بداية إيه؟
نائل: بداية عصر جديد، عصر النور، عصر الحب والسلام.
وأخيرا انتهت الحرب ورجعت كارا لمدينتها وشعبها وإيدها فـ إيد نائل منتصريين ع زورال وجيش نيربيس وكائنات الظلام بسبب قوة حبهم واتحاد قلوبهم وإيمانهم بوجود الحب فـ كل مكان، فوق أى ارض وتحت اى سما، بعد انتهاء الحرب كارا حبت تفاجئ نائل بهدية تعبيرا عن امتنانها وشكرها ليه، بعتت كائنات من شعبها بمركبة فضائية للأرض وأخدت أسرته وطلعت بيهم استضافتهم فوق سطح القمر، قربت منه وابتسمت ابتسامة صافية وبملامح هادية: نائل حبيبى، كارا سعيدة جدا، كارا عملت مفاجأة لـ نائل.
نائل بسعادة: كارا حبيبتي عملت ايه؟
كارا ميّلت راسها وبصت بعينيها ورا نائل وهى بتبتسم: بص وراك حبيبي.
نائل لفّ بجسمه يشوف المفاجأة واتصدم اول ما لمح همام وليلى ووائل جايين من بعيد مع الكائنات، عينه وسعت من الصدمة مش مستوعب اللى شايفه، وفضل ينقل نظراته بين كارا وبين أهله وبنبرة ذهول: انتي عملتي كدا ازاى؟!
كارا غمضت عيونها وهى مبسوطة: كارا تعمل المستحيل عشان نائل.
نائل باستغراب: حبيبتى وده فعلا المستحيل نفسه بس عملتيه ازاى؟!
كارا: اعطيت أمر لـ ميروك يرسل مركبتي الخاصة ويستضيف أهلك شوية ويرجعوا تاني كوكبكم.. وقربت منه بهمس: عشان مش يكونوا قلقانين لما انت مش ترجع تاني الأرض.
نائل: انتى عملتي كل ده عشان ما ارجعش تاني الأرض؟
كارا هزت راسها بسعادة وقبل ما ترد قطع كلامها وصول همام وليلى ووائل وهم مستغربين ومش فاهمين أى حاجة.
نائل بص لهم باشتياق وحب: حمد الله ع السلامة، نورتوا القمر ههههههههههه
ليلى مدت ايدها تمسك وش نائل ودموعها نازلة وهى بتتأكد انه واقف قدامها: يا نور عينى انا بجد شايفاك قدامي؟ انا مش مصدقة.
نائل مسك إيدها وباسها وباس جبينها: صدقي يا حبيبتي انا اهو واقف قدامك بشحمي ولحمي.
ليلى من كتر اشتياقها لـ نائل نسيت هى فين وشدته لحضنها بقوة، فجأة كارا قربت منهم بخطوتين ووقفت بين نائل وليلى وملامح وشها اتغيرت بسبب غيرتها ونبرة تحذير: سيبيه مش تلمسيه تاني، وإلا مش اخليكى تشوفيه خالص، نائل بتاع كارا وبس.
ليلى سابت نائل وبصت لـ كارا برفعة حاجب وبنبرة غضب ممزوجة بالصدمة: اييييييه؟! نائل ايه اللى بتاعك ده؟! اقفي عوج واتكلمي عدل، نائل ده ابني انا وهيرجع معايا الأرض، قال بتاعك قال.
كارا وقفت وحطت إيدها فـ وسطها وبصت لـ ليلى بغيظ: كارا بتحب نائل، هو ليا انا بس ليلى.
ليلى نبرة صوتها عليت: نععععم ياختي، هو مين اللي ليكي ده كمان؟! اما صحيح كائنة بجحة.
وائل قرب من نائل وهو بيضحك وعقله مش مستوعب وبنبرة ذهول: ألحق يا نائل أمك بهتت ع كارا، فض الاشتباك بسرعة ابوس ايدك قبل ما يولعوا فـ بعض ههههههههههه
همام واقف مصدوم وبيبص حواليه مش فاهم اي حاجة، ولف وشه لـ ليلى شايفها واقفة قدام كارا كأنها واقفة قدام غريمتها مش مجرد كائن فضائي: في ايه يا ليلى اهدي شوية، خلينا نفهم جينا هنا ازاى فجأة كدا بدل ما انتى بتتخانقي معاها.
ليلى: لا مش ههدى يا همام ومش عايزة اعرف جيت هنا ازاى، قبل ما اعرّفها ازاى تخطف ابنى وكمان تتخانق معايا عشان بحضنه وبطمن عليه.
كارا لفّت وشها لـ همام بابتسامة: مركبة كارا الملكية تقدر تجيب همام فوق سطح القمر وتقدر ترجعه تاني بيته فـ الأرض أى وقت.
وائل: يعني كارا ممكن تسيب نائل يرجع أرضه؟
كارا: مش تسيب نائل يرجع ع طول، بس ممكن تنزل معاه يزور همام ووائل شوية، ويجي تاني معاها، كارا بتحب نائل ومش تسيبه لـ ليلى.
نائل بص لـ كارا بحب: حبيبتى انا مش هسيبك، بس كمان ليلى أمي وما اقدرش اسيبها برضو.
ليلى عينها برقت من الصدمة وبنبرة غيظ: يعنى ايه الكلام ده يا بشمهندس؟
وائل بضحك: هيشغل مركبة كارا بالنفر ويفضل طالع نازل، القمر الأرض رمسيس عتبة تحرير تحرير تحرييير.
نائل بص لتوأمه بغيظ مصطنع: بس يا ظريف اسكت وبطل خفة دمك دي... وبص لـ ليلى بهدوء: تعالي يا ست الكل افسحك اجمل فسحة فـ حياتك، وسط النجوم المنورة دي وتمسكيها بايدك وكمان هعملك منها عقد يزين رقبتك يا قلبي.
كارا بصت لـ نائل بغيرة: كارا بس قلبك نائل.
نائل قرب من كارا وباس جبينها وهمس لها: كارا حبيبتى وقلبي، كل النجوم التي عبرتُها لم تُضئ لي الطريق كما أضاءه حبك،
وكل الأكوان التي مررت بها لم أجد فيها وطنًا يشبه حضنك،
أقسم بنبضي الذي صار ينبض باسمك، أنكِ النور الذي انتشلني من عتمة الكون، وأني ما جئتُ من الأرض إلى هنا، إلا لأزرعكِ في قلبي سماءً لا تغيب.
وبعد لحظات من المشاكسات الطريفة بين كارا وليلى وذهول همام ووائل اللي كانوا لسه مش قادرين يستوعبوا اللي بيحصل، قدر نائل بحكمته وحنانه يحتوي الموقف ويطمن أهله ويقنعهم إن الحب ملوش جنسية ولا كوكب، وكارا بحبها الفطري لـ نائل قررت تهديهم جزء من قدراتها قوة خارقة بسيطة تخلّيهم يتأقلموا مع الحياة ع سطح القمر من غير ما يحسّوا بغربة أو تعب، ومرت الأيام ما بين الفضول والاكتشاف، الضحك والحنين والحب اللي بقى لغة مفهومة ما بين البشر والكائنات الفضائية
وأخيرًا، لما حسّوا إن وقتهم انتهى وخلصت رحلتهم ركبوا المركبة ورجعوا لكوكب الأرض بس مش لوحدهم نائل رجع معاهم ومعاه كارا اللي رفضت تسيبه لحظة، قرر وقتها إنه يكمل حياته فوق سطح القمر، لأنه ببساطة ما بقاش قادر يتنفس بعيد عن كارا، وفـ كل لحظة اشتياق لـ أهله هيستخدم مركبة كارا الفضائية وينزلوا سوا الأرض يقعدوا فيها شوية او يبعت يجيب أهله فوق سطح القمر.
وبكدا نزلت الستارة ع حكايتنا، لكن فـ الحقيقة هى ما انتهتش بالعكس دي ابتدت، لما اتولد الحب من بين غبار الحروب، لما أجتمعت القلوب واتلاقت الأروح فـ ملكوته واتكلمت بلغة ما تعرفش حدود ولا كواكب.
فالنور ليس في السيوف، ولا في عدد الجيوش، بل في القلوب التي تؤمن بوجود الحب النقي، وفي الأرواح التي تُضيء رغم كل ظلام، فالحبّ حين يكون صادقًا، يصير سلاحًا لا يُقهر، والنقاء حين يسكن قلبًا، يصير نجمًا لا ينطفئ.
إلى أولئك الذين ظنّوا أن الظلام سيد هذا العالم، تذكروا دومًا أن قبسًا صغيرًا من الحب قد يكفي ليملأ الكون بأكمله نورًا.
كارا بقلمي✍️_______لبنى دراز
تمت بحمد الله