قصة الكفن المسكون
مقدمة عن الكاتب
السلام عليكم ورحم الله
دعونا نرحب معًا بهذه الموهبة المتألقة ، فهيا معًا لِنبدأ ♡♡
الاسم؟: محمد حسني السيد عياد والشهرة في الوسط الأدبي
(محمد العايدي)
السن؟:38 -
وهنا تحضرني رباعية صلاح جاهين التي قال فيها:
انا شاب لكن عمري ولا ألف
عام
وحيد ولكن بين ضلوعي زحام
خايف
ولكن خوفي مني انا
أخرس
ولكن قلبي مليان كلام
عجبي
المحافظة؟: القليوبية تحديدا المرج الجديدة لكني من مواليد حي شبرا مصر بالقاهرة
-الموهبة و لقبك:
هبدأ بالثانية لأن الأولى لي فيها رأي, اللقب
(هلفوت الكلمة) ده لقبي اللي انا لقبت به نفسي وكتير زعلوا من هذا اللقب بل صمموا يلقبونني بألقاب اخرى مثل (عقاد العصر) مايسترو الكلمة.. الكاتب
ذو الألف وجه.. لكن هلفوت الكلمة هو اللقب اللي شفت نفسي فيه لأن الهلفوت شخص هزيل بناء على نظرة الناس له مش عشان دي حقيقته الهلفوت شخص ممكن يكون عنده طاقة ابداعية جبارة لكنها ببساطة غيرمرتبة,وغير مرتبة ليه؟ عشان ظروف مجتمعه مش احسن حاجة وانا شايف نفسي جوايا حاجة بس بخلاف حتى الأدب والقصص حاجة تبني حاجة تضيف بس .. غير مرتبة عشان كدة شفت في نفسي صايع كلمة صايع كتابة اكتر من اديب بالمعنى التقليدي (هلفوت).
اما بخصوص السؤال عن الموهبة فخلونا نتفق ان في فرق بين الموهبة وبين الملكة! الموهبة تخص حاجة واحدة بسس ربنا بينعم بها على القليل من عباده وانا موهبتي كاتب روائي لكن الملكة تختلف الملكة هي الخاطر المتعددة الأنماط والانواع ممكن اكتب شعر يضاهي احسن الشعراء لكني مش شاعر.. ممكن اكتب اغاني وألحنها وده معروف عني لكني مش موسيقي.. هي ببساطة تعدد ملكات مش تعدد مواهب لان الموهبة تخص حاجة واحدة فقط يجيد المرء صنعها.
-هل بإمكانك أن تحدثنا عن نفسك؟:
انا الحلو اللي مش أمّور
وانا النجم اللي مش مشهور
وانا الحب اللي بقى
ضايع
معايا قلب حزين
مكسور
أنا اللقمة أنا الفتافيت
ومخبوط بحلمي ف حيط
ومرسوم كما الشخابيط
ومجروح كل مافيا
أنا الصعب اللي ف الإمكان
ومتلخبط في كل مكان
مسافر ويا الزمان
بحارب بعزم مافيا
أنا دايرة ومش، بتدور
انا السر اللي مش مستور
مانيش جاهل مانيش
مغرور
ورؤسائي حرامية.
انا النجم اللي مش مشهور
انا نسخة من فيلسوف
بحارب في أي ظروف
أنا أقوى من أي خوووف
واليوم معايا كأنه شهور
انا النجم اللي مش مشهور,
خلي حلمك جزء منك
لو عاش تعيش عشانه
ولو مات تموت معاه
الحلم لازم تستناه
الحلم بهجة الحلم
سرور
****
جزء من قصيدة انا النجم, هي ابلغ حاجة اتكلم بها عن نفسي لأني مش بعرف اتكلم عن نفسي بغير الفن والأدب.
-كيف إكتشفت موهبتك؟:
في الواقع الموهبة هي اللي اكتشفتني مش انا اللي اكتشفتها انا كنت انسان ضايع طفل عانى منذ الصغر عذاب الإعاقة وآلام البدن والنفس ظل يعاني الفقر والجهل وكمان المرض.. ابوه رفض يلحقه بالمدارس كي يتعلم لأنه كان يظن ان ابنه ممكن يعمل 10 15 عملية جراحية ويشفى ويمشي على رجليه.. للأسف كل العمليات فشلت والطفل كمل حياته عاجز تماما عن الحركة عام. 98
الطفل لقى نفسه بيكلم اشخاص من صنع خياله بيقعد معاهم يناقش وياهم تفاصيل يومه اللي عدى ويومه اللي جاي لحد ما الطفل علم نفسه بنفسه ودي قصة تانية وعرف يغزل كلمات وتصرفات وسلوكيات من وحي خياله عرف وقتها ان اللي حصل معاه اسمه بناء الشخصية القصصية وخلال نفس السنة بعد ما كان حاسس انه اخيرا هيلاقي نفسه عمل حادث وانكسرت رجله كسر فظيع تسبب في جلوسه عاجز عن اي شيء لمدة 3 سنين.
للحكاية باقية... بس مش وقته..
-متى بدأت الكتابة؟:
رجعت اكتب بعد التقاعد بسبب الحادث من جديد خلال عام 2000 لغايت ما قدرت انتج اعمال فنيه وأدبية فعلا.
بدأت بقصص الأطفال "فرفور المغرور"
القوة والسلام" وغيرها من القصص.
-من أول مشجع لك؟:
والدي شجعني وبعض اخوتي لكن دايما والدي كان بيختلف معايا على طريقة الكتابة بتعتي كان دايما يقولي حط رحمة ربنا في القصص ده ضروري ولازم لكن كان ردي عليه صادم. رحمة ربنا مش مستنياني عشان احطها في قصة..
-ماهي الصعوبات التي واجهتها؟ وكيف تخطيتها؟:
الخوف من القرصنة وكمان الوساطة ولاسيما مع الكاتب قعيد المقعد المتحرك بيُنظر له نظرة دنية بعض الشيء.
ايام حسني مبارك النشر كان درب من دروب المستحيل لكاتب من ذوي الاعاقة زيي. دي اهم المعوقات وهنا واجب اتوجه بالشكر لدار طريق العلا لأنها آمنت بقلم العايدي وتحدياته.
-هل تعتقد أنك ستتخلى يومًا عن موهبتك:
طبعا اكيد هيجي الوقت وابطل كتابة, لأن أكيد في يوم من الايام هموت واسيب الدنيا, اذا الكتابة سابتني طبعا هسيبها.
-ماذا تمثل لك موهبتك:
إدراك الهدف من الوجود لأني دايما كنت ببحث عن اسباب الوجود ولاقيت ان موهبتني وملكاتي اجابتني
عن هذا السؤال
(انت عايش عشان تكتب مش بتكتب عشان عايش).
-أرِنا بعض من كتاباتك:
طمريح" هو اسم لأحد أحفاد الوسواس الخناس إبليس" سمته امهُ بهذا الاسم تيمنا بأحد ابناء ابليس.
ذات نهار أسود لم تطلع خلاله شمس الصبح قام طمريح بمراهنة أشقاءه من قُرناء الجن السُفلي على الوسوسة لأحد علماء الكمياء من بني آدم حتى يستطيع نشر الدمار خلال ومضة زمن لا تُذكر حيث الضياع والهلاك في أسرع وقت ممكن بحيث يطرأ الى ذهن العالم فكرة شيطانية لنشر الأذى في أسهل الطرق وأسرع وقت, وتم الرهان بالفعل وذهب على وجه السرعة الخارجة عن إطار الزمان والمكان الى معمل العالم الكميائي الذي يُدعى (شارابوف ميخائيل)
لتحدث الكارثة كارثة يدفع ثمنها الأبرياء. بل سيدفع طمريح نفسه ثمن اعتقاده الخاطئ بأن الإنسان أقل شرا من الأبالسة..
من قصة طيور بلا أجنحة
(هلفوت الكلمة)
معرض القاهرة الدولي للكتاب 2024
@طريق_العلا_للنشر_والتوزيع_والترجمة.
-من هو مثلك الأعلى في هذا المجال؟:
في مجال الرواية نجيب محفوظ لأني بعشق جرأته وثورته ضد النمطية.. وفي مجال التثقيف بعشق شخصية الدكتور مصطفى محمود.. وبعشق اسلوب انيس منصور.
-هل ترى أن التواصل الإجتماعي لهُ دورًا في هذا المجال؟: للأسف ارى ذلك وبوضوح. المسألة اصبحت مختزلة في العلاقات مادام هناك علاقات متعددة للكاتب تُسوق اعماله بأحسن الطرق, والتسويق نصف الطريق نحو التوزيع الناجح للعمل.. لكن التوزيع للرواية ليس دليلا على جودة المحتوى وانا سأظل عند هذا الرأي.
مجلات (البلاي بوي) هي الأعلى توزيعا على مستوى العالم كمحتوى ورقي.. لأنها ببساطة تقدم محتوى
(رخيص)..
-ما هي طموحاتك؟:
أطمح ان اكون انسان معنى وليس صفة وأُعامل معاملة انسان طبيعي له حقوق وعليه واجبات.
-رسالة توجهها لِكل كاتب مبتدئ:
الرواية تختلف عن موضوع التعبير اللي كنت بتكتبه وانت تلميذ وبتاخد نجمه عليه الرواية سردا وحوارا وانطباعات للشخصيات والتعبير عن السلوكيات بأبعادها النفسية المختلفة تختلف كل الاختلاف عن موضوع الإنشا بتاع حضرتك.. نصيحتي اكتب الرواية بشكل فني مش بشكل ديناميكي انشائي أو فلسفلي أهوج عشان توريني انك فيلسوف, الروائي الشاطر مش شرط ابدا يكون فيلسوف.
نصيحة كمان: مش كل تجارب حضرتك بالضرورة تظهر في الرواية ويتم اقحامها في الاحداث.. تجارب حضرتك ميصحش تفرضها على القارئ!.مش دايما تبحث عن المنطقية في رواياتك لأنك بتكتب رواية خيالية مثلا مينفعش تقحم فيها المنطق ازاي؟ ماهي خيال في خيال؟
ساعتها لو انت كاتب شاطر بتعمل ايه؟ اقولك:
بتخلق حالة من اللا منطق الذي يؤيده المنطق ذاته
فكثيرا ما يكون اللا منطق منطق عظيم في حد ذاته.
محمد العايدي..
روابط الفصلين
الفصل الاول
https://pub514.ayam.news/234748
الفصل الثاني
https://firdausnovels.blogspot.com/2024/03/Firdausnovel_01474266412.html